زیرِ نظر مقالہ  ”اسلامک یونیورسٹیز لیگ ہیڈآفس ازہر یونیورسٹی مصر“  کے زیر اہتمام انٹرنیشنل عربی کانفرنس منعقدہ 22-26 جنوری2001ء شاہِ فیصل یونیورسٹی چاڈ کیلئےتحریر کیا گیا۔ جسمیں غیرعرب مسلم طلباء کو بالعموم اور چاڈ کے طلباء کو بالخصوص عربی زبان سیکھنے کی راہ میں درپیش مشکلات اور ان کا حل پیش کرنے کی کوشش کی گئی ہے۔  پاکستان افرنگی اور چاڈ فرانسیسی استعمار کے قبضہ سے علی الترتیب 14 اگست 1947ء اور 11اگست 1960ء کو آزاد ہوئے۔ اہلِ چاڈ کی اکثریت عربی النسل ہے۔مگر بطور سرکاری زبان ’گھر کی مالکن کے اختیارات‘  فرانسیسی زبان کے پاس ہی رہے۔ عربی زبان کو اسکے حقیقی مقام سے بالکل اسی طرح محروم رکھا گیا جیسے وطنِ عزیز میں انگریزی کے مقابلہ میں اردو کو۔ اس تناظر میں چاڈ‘ پاکستان‘ ایران‘ ترکی‘ملائشیا و دیگر غیرعرب مسلم ممالک کے طلباء کو قرآن مجید کی زبان سیکھنے کے حوالے سے تقریباً ایک جیسی مشکلات کا سامنا ہے اور ان کا حل بھی ایک جیسا ہے جس کی تفصیل مقالے میں موجود ہے۔